Hemeroteca web | RSS  RSS     Luns 24.07.2017 Actualizado 20:41
El Correo Gallego Radio Obradoiro CorreoTV Anova multiconsulting

Galicia Hoxe

Noticia 1 de 1 Galicia  |   RSS - Galicia RSS

Os dobres graos de Matemáticas con Física e con Informática da USC, carreiras con maior nota de referencia

O primeiro prazo de matrícula estará aberto ata as 14,00 horas do día 14 // En total, hai oito convocatorias para matricularse nas universidades galegas

SANTIAGO. EP  | 11.07.2017 
A- A+

As carreiras que presentan unha maior nota de referencia nas tres universidades galegas son o dobre grao de Matemáticas con Física e o de Enxeñaría Informática e Matemáticas da Universidade de Santiago de Compostela, nas cales os alumnos deben obter unha media de 13,466 e 13,226 puntos, respectivamente para poder cursar estes estudos.

O Campus de Santiago de Compostela é o que presenta unhas notas de referencia máis elevadas, segundo a listaxe feita pública pola Comisión Interuniversitaria de Galicia, posto que conta cun total de 16 titulacións que superan notas de 10 puntos.

As seguintes carreiras da USC con maior puntuación esixida son o dobre grao en Comunicación Audiovisual e Xornalismo, que en principio conta cunha nota de referencia de 12,942; seguida de Medicina, con 12,575; os dobres graos de Química e Física, con 12,390, e de Química e Bioloxía, con 12,296; así como Odontoloxía, con 12,15.

No Campus de Lugo, a cualificación máis elevada corresponde a Veterinaria, con 11,066, seguida do grao de Mestre en Educación Infantil e Educación primaria, con 10,68.

Na Universidade da Coruña, as notas medias máis altas son o dobre grao de Bioloxía e Química, cun 11,95 e o de ADE e Dereito, cun 11,086. No campus de Ferrol, Enfermaría cun 9,7 é a máis elevada.

Pola súa banda, na Universidade de Vigo, a puntuación superior vólvea presentar Tradución e Interpretación Español-Inglés, con 11,812, seguida de ADE-Dereito, con 10,95, mentres que no seu Campus de Ourense, Enxeñaría Aeroespacial esixe unha cualificación de 11,78 e no de Pontevedra, para acceder a Fisioterapia pártese dunha nota de 10,806.

MATRÍCULAS

Estas notas feitas públicas pola CIUG constitúen unha referencia, dado que a nota de corte establécese cando se peche matrícula. O último alumno matriculado dunha carreira é o que marca a nota de corte.

O primeiro prazo de matrícula estará aberto ata as 14,00 horas do día 14. En total, hai oito convocatorias para matricularse nas universidades galegas.

A preasignación de prazas quedará resolta para tres destes prazos no mes de xullo, onde a CIUG espera que xa quede matriculado unha porcentaxe "moi alta" de estudantes, que podería alcanzar o 80%. Posteriormente, haberá outros tres prazos en setembro e finalmente, outros dous en outubro.

 

Grupo Correo Gallego
Ante calquera dúbida, problema ou comentario nas páxinas de Galicia Hoxe envíe un e-mail a info@galicia-hoxe.com. Titularidade e política de privacidade. Política de Cookies
Auditoría Audiencia Sites
Titulares RSS