Hemeroteca web | RSS  RSS     Martes 20.02.2018 Actualizado 20:16
El Correo Gallego Radio Obradoiro CorreoTV Anova multiconsulting

Galicia Hoxe

Noticia 1 de 1 Galicia  |   RSS - Galicia RSS

En Marea denuncia "parálise" das directrices de paisaxe e vincúlao con que parques eólicos poidan esquivalas

Pregunta á Xunta se espera "feitos consumados" e advirte de que as empresas alegaron para que ese documento non teña aplicación retroactiva

SANTIAGO. EP  | 14.02.2018 
A- A+

En Marea denunciou que as directrices de paisaxe "están paralizadas" desde decembro de 2016, cando comezaron o proceso de consulta pública, algo que vinculou con que a instalación de futuros parques eólicos poidan esquivar os criterios que este documento imporá para a protección do patrimonio.

En rolda de prensa, o viceportavoz da formación rupturista no Parlamento galego, Antón Sánchez, e o deputado Pancho Casal acusaron á Xunta de "falta de planificación, de modelo, de participación cidadá e de retorno económico" en materia de enerxías renovables.

Pola súa banda, Sánchez criticou o "acelerón que se pretendeu dar para seguir engordando as contas das eléctricas e dos bancos" a través da lei de implantación de iniciativas empresariais, á que se referiu como "lei de depredación" e que lembrou que reduce os trámites ás compañías.

Subliñando a aposta do seu grupo polas renovables e en concreto polo sector eólico, con gran "potencial" en Galicia, o viceportavoz de En Marea censurou cuestións que o Goberno galego, ao seu xuízo, "non está a facer", como ter en conta o impacto, a eventual "destrución" do patrimonio e a distancia dos muíños aos núcleos de poboación.

"ESTAFA XENERALIZADA"
Así, puxo como exemplo dous parques previstos en Cabana de Bergantiños e en Laxe, na provincia da Coruña, para denunciar a "estafa xeneralizada". No primeiro dos casos, cifrou nuns 2.000 euros anuais o que repercutirá a súa instalación no pobo: "Non significa nada", dixo. No segundo, apuntou que os veciños non recibirán "nin un só euro", por ser tres torres, e pese ao rexeitamento da corporación.

Pola súa banda, Pancho Casal, previamente, aludiu ao canon eólico e aos 40 millóns de euros, segundo os seus números, que todos os galegos terán que pagar "para devolverlle ás eléctricas" o que abonaron por este concepto no ano 2013.

Por todo iso, En Marea presentará iniciativas orientadas a "revisar" o plan sectorial eólico de Galicia, tendo en conta que as directrices de paisaxe, segundo indica, contemplan a súa modificación unha vez estean aprobadas.

Coa súa "paralización", preguntouse Antón Sánchez se o Executivo de Alberto Núñez Feijóo pretende chegar aos "feitos consumados", con parques xa instalados e que non seguisen criterios máis estritos de protección da paisaxe.

E é que nesta mesma liña tamén indicou que algunhas empresas interpuxeron alegacións a ese documento, precisamente, para que unha vez entre en vigor non teña unha aplicación con carácter retroactivo.

Grupo Correo Gallego
Ante calquera dúbida, problema ou comentario nas páxinas de Galicia Hoxe envíe un e-mail a info@galicia-hoxe.com. Titularidade e política de privacidade. Política de Cookies
Auditoría Audiencia Sites
Titulares RSS